تیلگو فلم انڈسٹری کی معروف اداکارہ رشمیکا مندانا اور اداکار وجے دیوراکونڈا کی ممکنہ شادی کی تاریخ سامنے آگئی۔
رشمیکا مندانا اور اداکار وجے دیوراکونڈا نے ابھی تک خود اپنی منگنی کی تصدیق نہیں کی، تاہم اب بھارتی میڈیا پر ان کی شادی کی رپورٹس آنا شروع ہو گئی ہیں۔
بھارتی میڈیا کے مطابق اس جوڑے نے گزشتہ ماہ حیدرآباد میں ایک نجی تقریب میں منگنی کیں اور اب شادی کے بندھن میں بندھنے کے لیے تیار ہیں۔
بھارتی رپورٹس میں دعویٰ کیا گیا ہے کہ رشمیکا اور وجے 2026 کے دوسرے مہینے فروری میں شادی کے بندھن میں بندھ جائیں گے، جبکہ شادی کی تاریخ اور مقام طے کر لیے گئے ہیں۔
یاد رہے کہ گزشتہ ماہ ایک فلم کی تشہیر کے دوران جب رشمیکا سے وجے دیوراکونڈا کے ساتھ منگنی کے بارے میں سوال کیا گیا تو اداکارہ نے مسکراتے ہوئے جواب دیا، ’’سب کو سب معلوم ہے۔‘‘ بھارتی میڈیا اور مداحوں نے اس جملے کو ان کے رشتے کی خاموش تصدیق قرار دیا۔
دوسری جانب رشمیکا نے اپنے انسٹاگرام اکاؤنٹ پر ایک ویڈیو بھی شیئر کی جس میں اُن کے بائیں ہاتھ کی چمکتی ہوئی انگوٹھی نے سب کی توجہ سمیٹ لی۔ بھارتی میڈیا کا دعویٰ ہے کہ یہ انگوٹھی ان کی منگنی کی نشانی ھے
جنوبی بھارتی میڈیا کے مطابق تیلگو سنیما کی اس معروف جوڑی کے درمیان 2018 میں فلم ’گیتھا گوندَم‘ کے بعد سے قریبی تعلقات کی خبریں زیرِ گردش ہیں۔ تاہم دونوں اداکاروں نے اپنے رشتے کے بارے میں خاموشی اختیار کر رکھی ہے
