پاکستان کے لیجنڈ گلوکار راحت فتح علی خان کی بیٹی ماہین خان نے اپنی شادی کی تقریبات کے لباس پر ہونے والی تنقید کا بھرپور جواب دے دیا ہے۔
تفصیلات کے مطابق ماہین خان کی حال ہی میں مایوں اور نکاح کی تقریبات منعقد ہوئیں، جن میں انہوں نے ایک بھارتی ڈیزائنر کا لباس زیب تن کیا۔ ان تقریبات کی تصاویر سوشل میڈیا پر وائرل ہوئیں، جس کے بعد بعض صارفین نے بھارتی ڈیزائنر کا لباس پہننے پر انہیں تنقید کا نشانہ بنایا۔
تنقید کے جواب میں ماہین خان نے سوشل میڈیا پر ایک ویڈیو پیغام جاری کیا، جس میں انہوں نے ناقدین کو آڑے ہاتھوں لیتے ہوئے کہا کہ “خدا کا واسطہ ہے، لوگوں کی زندگیوں میں دخل دینا بند کریں۔”
انہوں نے مزید کہا کہ وہ بھارتی، چائنیز یا افغانستانی کسی بھی ڈیزائنر کا لباس پہنیں، یہ ان کی ذاتی پسند اور ان کی شادی ہے، جس پر کسی کو اعتراض کا حق نہیں۔
ماہین خان کے اس دوٹوک مؤقف کے بعد سوشل میڈیا پر صارفین کی جانب سے مختلف ردعمل سامنے آ رہے ہیں۔ کچھ صارفین نے ان کی حمایت کرتے ہوئے ذاتی آزادی کے حق میں آواز اٹھائی، جب کہ بعض افراد نے اختلاف کرتے ہوئے کہا کہ ایسے لباس مقامی ثقافت کی نمائندگی نہیں کرتے۔
یہ معاملہ اس وقت سوشل میڈیا پر خاصا زیر بحث ہے اور صارفین مختلف زاویوں سے اپنی رائے کا اظہار کر رہے ہیں۔
