پنجاب حکومت کے 25 بڑے منصوبے جلد شروع کرنے کا فیصلہ

لاہور : پنجاب حکومت کے 25 بڑے منصوبے جلد شروع کرنے کا فیصلہ کرلیا ، جن میں انڈر پاسزو فلائی اوورز کی تعمیر، شاہراہوں کی توسیع، سنگل سےدو رویہ شاہراہ کےمنصوبے شامل ہیں۔
تفصیلات کے مطابق صوبائی وزیر تعمیرات و مواصلات ملک صہیب احمد بھرتھ کی زیر صدارت اجلاس میں پنجاب حکومت نے صوبے بھر میں 25 بڑے ترقیاتی منصوبے جلد شروع کرنے کا فیصلہ کیا ہے۔
اجلاس میں بتایا گیا کہ ان منصوبوں میں انڈر پاسز، فلائی اوورز کی تعمیر، شاہراہوں کی توسیع اور سنگل شاہراہوں کو دو رویہ کرنے کے منصوبے شامل ہیں، مجموعی طور پر 88.65 ارب روپے کی لاگت سے ان منصوبوں پر جلد کام شروع کیا جائے گا۔
صوبائی وزیر کو اجلاس میں تمام منصوبوں کے حوالے سے تفصیلی بریفنگ دی گئی۔
ملک صہیب احمد بھرتھ نے بتایا کہ راولپنڈی میں 28.12 ارب روپے کی لاگت سے 10 تعمیراتی منصوبوں پر جلد کام شروع ہوگا، جن میں کشمیری بازار کی توسیع، انڈر پاسز اور فلائی اوورز کی تعمیر شامل ہیں۔
اجلاس میں مزید بتایا گیا کہ شیخوپورہ تا فاروق آباد روڈ کو 6.94 ارب روپے سے، اوکاڑہ تا دیپالپور 24.2 کلومیٹر روڈ کو 12.29 ارب روپے سے اور مظفرگڑھ تا علی پور 22.84 کلومیٹر شاہراہ کو 9.48 ارب روپے سے دو رویہ کیا جائے گا۔
ملک صہیب احمد بھرتھ نے متعلقہ حکام کو ہدایت کی کہ تمام منصوبوں پر جلد از جلد عملدرآمد کو یقینی بنایا جائے۔
انہوں نے کہا کہ وزیراعلیٰ پنجاب کے ویژن کے مطابق تعمیر و ترقی کا سفر تیزی سے جاری ہے، جس سے صوبے کے عوام کو براہِ راست فائدہ پہنچے گا۔