نومنتخب میئر نیویارک ظہران ممدانی کس سابق پاکستانی کرکٹر سے متاثر ہیں؟

پاکستانی کرکٹرز کی ایک دنیا پرستار ہے تاہم نیویارک کے نومنتخب میئر ظہران ممدانی بھی سابق قومی کرکٹر کے فین نکلے۔
اس وقت دنیا میں ظہران ممدانی کا چرچا ہو رہا ہے، جو گزشتہ روز امریکا کے سب سے بڑے شہر نیویارک کے پہلے جنوبی ایشیائی نژاد اور مسلم میئر منتخب ہوئے ہیں۔
ایک دنیا 34 سالہ ظہران ممدانی کی شخصیت کی پرستار ہو رہی ہے لیکن ممدانی خود ایک سابق پاکستانی کرکٹر کے پرستار دکھائی دیتے ہیں۔
نومنتخب میئر نیویارک کی الیکشن مہم کے دوران کی ایک ویڈیو سوشل میڈیا پر وائرل ہو رہی ہے۔ اس ویڈیو میں وہ پاکستان کے سابق ٹیسٹ کرکٹر اور موجودہ کمنٹیٹر رمیز راجا کے ایک جملے کا حوالہ دیتے ہوئے اپنی ٹیم کو مخاطب کرتے ہیں۔
ظہران ممدانی اپنی الیکشن ٹیم سے مخاطب ہوئے کہتے ہیں کہ (The ability to snatch defeat from the jaws of victory)۔ یہ وہ جملہ ہے جو رمیز راجا اکثر پاکستانی ٹیم کے لیے دہراتے رہتے ہیں۔
دوسری جانب سوشل میڈیا پر وائرل اس ویڈیو کے ساتھ رمیز راجا نے ایکس پر ظہران ممدانی کو نیویارک کا میئر منتخب ہونے پر مبارک باد پیش کی ہے۔