نیپال: طوفانی بارش نے تباہی مچادی، 47 ہلاک، ایئرپورٹس بند

نیپال میں گزشتہ روز ہونے والی موسلادھار بارش اور لینڈ سلائیڈنگ نے ملک بھر میں نظام زندگی کو درہم برہم کر دیا، سیلابی پانی کے باعث 47 افراد ہلاک ہوگئے، طوفانی بارش کے بعد انتظامیہ نے اگلے تین روز کے لیے تمام سڑکوں کو بند کردیا۔
غیر ملکی ذرائع ابلاغ کے مطابق نیپال گزشتہ 24 گھنٹوں سے مسلسل بارش کی زد میں ہے، جس کی وجہ سے درجنوں مقامات پر لینڈ سلائیڈنگ ہوئی اور قومی شاہراہیں بلاک ہو گئیں۔
بارش کے باعث سینکڑوں گاڑیاں پھنس گئیں۔ انتظامیہ نے اگلے تین دنوں کے لیے کھٹمنڈو آنے اور جانے پر پابندی لگا دی ہے۔ عوام سے اپیل کی گئی ہے کہ وہ گھروں کے اندر رہیں اور باہر نہ نکلیں۔
بارش کے باعث ملک بھر کے ہوائی اڈوں کو بند کردیا گیا، تمام گھریلو پروازیں اگلے دو دنوں کے لیے معطل کر دی گئیں، کھٹمنڈو کا بین الاقوامی ایئرپورٹ بھی بند ہے جس سے مسافروں کو پریشانی کا سامنا ہے۔ تمام ملکی ایئرلائنز نے موسم بہتر ہونے تک پروازیں منسوخ کرنے کا فیصلہ کیا ہے۔
وزارت داخلہ نے کہا ہے کہ حکومت نے نیشنل ڈیزاسٹر مینجمنٹ اور اسپتالوں کے علاوہ تمام محکموں کے لیے چھٹی کا اعلان کیا ہے۔
سعودی عرب، تیل کے علاوہ دیگر شعبوں کی آمدن میں بڑا اضافہ
سیلاب کے باعث ساحلی علاقوں کے مکینوں کو محفوظ مقامات پر منتقل کیا جارہا ہے، حکومت نے عوام سے چوکس رہنے، محفوظ مقامات پر رہنے اور گھروں سے نکلنے سے گریز کرنے کا مشورہ دیا ہے۔ تمام ہیلی کاپٹر کمپنیوں کو اسٹینڈ بائی پر رہنے کا حکم دیا گیا ہے