کراچی: وزیراعلیٰ سندھ مراد علی شاہ سے وفاقی وزیر برائے مواصلات علیم خان نے اپنے اعلیٰ سطحی وفد کے ہمراہ ملاقات کی، جس میں سندھ میں جاری اور مجوزہ موٹروے منصوبوں پر تفصیلی گفتگو ہوئی
اجلاس میں حیدرآباد سے سکھر تک ایم-6 موٹروے منصوبے پر تفصیلی گفتگو کی گئی۔ وزیراعلیٰ سندھ نے کہا کہ یہ منصوبہ طویل عرصے سے نظر انداز ہوتا رہا ہے، تاہم اب وفاقی حکومت نے اس کی منظوری دے دی ہے جس پر ہم شکر گزار ہیں۔
وفاقی وزیر علیم خان نے آگاہ کیا کہ ایم-6 موٹروے کی تعمیر پر 363 ارب روپے لاگت آئے گی اور یہ منصوبہ نیشنل ہائی وے اتھارٹی کے زیر انتظام ہوگا۔
اجلاس میں کراچی تا حیدرآباد نئے موٹروے منصوبے (ایم-10) پر بھی بریفنگ دی گئی۔ منصوبے کے مطابق نئی موٹروے کی لمبائی 168 کلومیٹر ہوگی، یہ 6 رویہ شاہراہ ہوگی جس میں 10 انٹرچینجز شامل ہوں گے۔
حکام نے بتایا کہ ایم-10 کو دو حصوں میں تعمیر کیا جائے گا اور اس منصوبے کے سروے کا کام پہلے ہی شروع ہو چکا ہے۔
اجلاس میں فیصلہ کیا گیا کہ دونوں منصوبوں پر جلد از جلد عملی کام کا آغاز کیا جائے گا تاکہ ٹرانسپورٹیشن انفرااسٹرکچر بہتر ہو اور صوبے کی معیشت کو تقویت ملے۔
