ملک میں بڑی فصلیں سیلاب کی نذر ہونے سے معاشی ترقی کے اہداف متاثر

اسلام آباد (11 ستمبر 2025): وزارت خزانہ کے ذرائع نے خدشہ ظاہر کیا ہے کہ ملک میں بڑی فصلیں سیلاب کی نذر ہونے سے معاشی ترقی کے اہداف متاثر ہو سکتے ہیں۔
تفصیلات کے مطابق آئی ایم ایف کے ساتھ دوسرے اقتصادی جائزے کے لیے شیڈول طے پا گیا ہے، مانیٹری فنڈ کا وفد 25 ستمبر سے 8 اکتوبر تک دورہ کرے گا، پہلے مرحلے میں تکنیکی، دوسرے مرحلے میں پالیسی سطح کے مذاکرات ہوں گے۔
مذاکرات وزارت خزانہ، وزارت توانائی، منصوبہ بندی، اسٹیٹ بینک، ایف بی آر، اوگرا، نیپرا سمیت دیگر اداروں اور وزارتوں کے ساتھ ہوں گے، پنجاب، سندھ، خیبرپختونخواہ اور بلوچستان سے الگ الگ مذاکرات ہوں گے۔
ذرائع کے مطابق پاکستان نے قرض پروگرام کی تیسری قسط کے حصول کے لیے اہداف حاصل کر لیے ہیں، پاکستان کا بجٹ خسارہ اور کرنٹ اکاؤنٹ خسارہ آئی ایم ایف کے اہداف کے مطابق ہے، نان ٹیکس آمدن کے اہداف بھی آئی ایم ایف کے اہداف کے مطابق ہیں۔
پنجاب میں سیلاب متاثرین سے کشتی مافیا کی لوٹ مار، فی خاندان ایک لاکھ روپے وصول کیے جانے کا انکشاف
ذرائع کا کہنا ہے کہ مہنگائی کے بڑھنے کی شرح 5.1 فی صد کے مقررہ ہدف سے کم ہے، سیلاب کی وجہ سے ٹیکس آمدن کے اہداف میں معمولی کمی ہے، سیلاب کی وجہ سے بڑی فصلیں چاول، مکئی اور کپاس متاثر ہو سکتی ہیں، اور بڑی فصلیں سیلاب کی نذر ہونے سے معاشی ترقی کے اہداف متاثر ہو سکتے ہیں۔
ذرائع کے مطابق پاکستان میں ٹیکس آمدن کے لیے پالیسی بورڈ وزارت خزانہ کے پاس منتقل کر دیا گیا ہے۔