کراچی پورٹ پر پہلی عالمی معیار کی بنکرنگ سروس کا آغاز

اسلام آباد (18 نومبر 2025): کراچی پورٹ پر پہلی عالمی معیار کی بنکرنگ سروس کا آغاز ہوگیا جس کیلیے تاریخ کا پہلا لائسنس بھی جاری کر دیا گیا۔
وفاقی وزیر بحری امور جنید انوار چوہدری نے اپنے بیان میں اس کی تصدیق کرتے ہوئے بتایا کہ پاکستان میں بنکرنگ کیلیے تاریخ کا پہلا لائسنس جاری کر دیا، کراچی پورٹ پر پہلی عالمی معیار کی بنکرنگ سروس کا آغاز ہوگیا ہے۔
جنید انوار چوہدری نے بتایا کہ متعدد بین الاقوامی کمپنیوں نے بھی بنکرنگ لائسنس کیلیے دلچسپی ظاہر کی ہے، مستقبل میں پورٹس سے اربوں روپے کی آمدنی متوقع ہے جہاں جہازوں کو بین الاقوامی معیار کا فیول سپلائی نظام دستیاب ہوگا۔
انہوں نے مزید بتایا کہ بنکرنگ سروس وزیر اعظم شہباز شریف کی خصوصی ہدایات پر شروع کی گئی، عالمی معیار کی بنکرنگ سے کراچی پورٹ کی علاقائی مسابقت بڑھے گی جبکہ منظم سروسز سے غیر ملکی شپنگ لائنز کی آمد بڑھے گی۔
ان کا کہنا تھا کہ بنکرنگ آپریشنز سے قیمتی زرمبادلہ حاصل ہوگا، کراچی پورٹ میں عالمی حفاظتی اور آپریشنل اسٹینڈرڈز نافذ کر دیے گئے، نئی سروس سے مرمت، سپلائیز اور میری ٹائم لاجسٹکس میں روزگار میں اضافہ ہوگا، ایندھن کے معیار، دستاویزات اور شفافیت پر عالم اصولوں کی مکمل پابندی ہوگی۔
واضح رہے کہ بنکرنگ میں بحری جہازوں کو ایندھن فراہم کیا جاتا ہے۔