اسلام آباد (11 نومبر 2025): اسلام آباد کچہری کے باہر خودکش دھماکے کے سلسلے میں ابتدائی رپورٹ سامنے آگئی۔
ابتدائی رپورٹ کے مطابق خودکش حملہ آور پیدل کچہری کے باہر پہنچا اور کچھ دیر تک گیٹ کے قریب بیٹھا رہا، کچہری کے اندر جانے والوں کی چیکنگ جاری تھی بظاہر حملہ آور اندر جانا چاہتا تھا۔
رپورٹ میں بتایا گیا کہ خودکش حملہ آور سکیورٹی چیکنگ کے باعث رک گیا، اس نے سڑک پر دھماکے سے خود کو اڑا لیا، حملے کے وقت 35 سے 40 افراد موقع پر موجود تھے۔
دوسری جانب، وفاقی وزیر داخلہ محسن نقوی خودکش دھماکے مقام پر پہنچ گئے جہاں ان کو آئی جی اسلام آباد اور دیگر قانون نافذ کرنے والے اداروں کی جانب سے بریفنگ دی گئی۔
محسن نقوی نے بتایا کہ آج 12 بج کر 39 منٹ پر خودکش دھماکا ہوا جس میں 12 لوگ شہید اور 27 زخمی ہیں، وزیر اعظم شہباز شریف نے زخمیوں کے فوری علاج ہدایت کی، خودکش حملہ آور کچہری کے اندر جانے کا پلان کر رہا تھا، دہشتگرد نے اندر جانے کا موقع نہ ملنے پر پولیس کی گاڑی پر حملہ کیا۔
وزیر داخلہ نے کہا کہ ہماری پہلی ترجیح ہے خودکش حملہ آور کی شناخت کریں، کل وانا میں بھی کار سوار خودکش حملہ آور نے انٹری پوائنٹ پر خود کو اڑایا جہاں کلیئرنس جاری ہے، وانا حملے میں افغانستان ملوث ہے دہشتگرد افغانستان سے رابطے میں ہیں۔
انہوں نے کہا کہ کچہری خودکش حملے میں ملوث کرداروں کو بھی سامنے لایا جائے گا، افغانستان کو شواہد پیش کیے کہ کیسے لوگوں کو ٹریننگ دی جا رہی ہے۔
