کراچی(8 اکتوبر 2025): پاکستان پیپلز پارٹی(پی پی پی) نے حکومت کو ٹف ٹائم دینے کیلئے پارلیمنٹ اجلاسوں سے متعلق نئی حکمت عملی تیار کرلی۔
پی پی ذرائع کے مطابق حکومت کو نئی اسٹریٹجی کے تحت پارلیمان میں ٹف ٹائم ملے گا، پیپلز پارٹی پارلیمنٹ میں ہونے والی قانون سازی پر اثر انداز ہو گی۔
ذرائع کا کہنا ہے کہ پیپلز پارٹی سینیٹ، قومی اسمبلی کے انعقاد میں رکاوٹ ڈالے گی، سینیٹ، قومی اسمبلی اجلاس کے آغاز پر کورم کی نشاندہی کرے گی اور پارلیمنٹ کا کورم پورا نکلنے پر اجلاس کا بائیکاٹ کرے گی۔
ذرائع پیپلز پارٹی کا کہنا ہے کہ پی پی سینیٹ، قومی اسمبلی کی قانون سازی روکنے کی کوشش کرے گی اور سینیٹ، قومی اسمبلی میں قانون سازی کا حصہ نہیں بنے گی۔
واضح رہے کہ گززشتہ رز پاکستان پیپلز پارٹی (پی پی پی) اور مسلم لیگ (ن) کے درمیان جاری تناؤ آج اس وقت شدت اختیار کر گیا، جب سینیٹر شیری رحمٰن نے اتحادی جماعت کو خبردار کیا کہ اگر پیپلز پارٹی کی ’ واضح حمایت‘ حاصل نہ ہوئی تو سینیٹ میں مشکلات کا سامنا کرنا پڑ سکتا ہے۔
واضح رہے کہ گزشتہ کئی دنوں سے پی پی پی اور (ن) لیگ کی پنجاب قیادت کے درمیان سیلاب متاثرین کے معاوضے اور چولستان نہر منصوبے کے تناظر میں پانی کے حقوق جیسے مسائل پر زبانی جنگ جاری ہے۔
سندھ میں حکومت رکھنے والی پیپلزپارٹی، پنجاب کی وزیر اعلیٰ مریم نواز کے بیانات پر خاص طور پر برہم ہے، جن کی جماعت وفاق میں بھی حکمران ہے۔
