الیکشن کمیشن کا پنجاب میں بلدیاتی انتخابات مؤخر ہونے پر مختلف سیاسی جماعتوں کی جانب سے کی جانب والی تنقید پر ردعمل آگیا۔
ترجمان الیکشن کمیشن کے مطابق پنجاب میں بلدیاتی انتخاب مؤخر کرنے پر تنقید آئین و قانون سے لاعلمی ظاہر کرتی ہے، آرٹیکل 140اے کے تحت بلدیاتی نظام کا قانون بنانا صوبائی حکومت کی ذمہ داری ہے اور الیکشن کمیشن صوبائی قوانین اور رولز کے مطابق ہی انتخابات کرانے کا مجاز ہے۔
ترجمان نے کہا کہ حکومت پنجاب نے لوکل گورنمنٹ ایکٹ 2025 نافذ کر کے ایکٹ 2022 کو منسوخ کر دیا ہے الیکشن کمیشن منسوخ شدہ قانون کے تحت انتخابات نہیں کرا سکتا اور نئے بلدیاتی ایکٹ کے نفاذ کے بعد سابقہ حد بندی شیڈول واپس لینا ناگزیر تھا۔
ترجمان کا کہنا ہے کہ الیکشن کمیشن نے صوبائی حکومت کو حلقہ بندی رولز کی تکمیل کےلیے 4 ہفتے کا وقت دیا ہے مقررہ مدت پوری ہوتے ہی نئی حلقہ بندیوں کاشیڈول جاری کر دیا جائےگا حلقہ بندیوں کا عمل مکمل ہوتے ہی بلدیاتی انتخابات کرا دیے جائیں گے، چیف سیکرٹری اورسیکرٹری لوکل گورنمنٹ کو 30 اکتوبر کو الیکشن کمیشن میں طلب کیا گیا ہے۔
