بھارتی آرمی چیف جنرل اپیندر دیویڈی نے آپریشن سندور کے دوسرے مرحلے کے آغاز کا اشارہ دیتے ہوئے کہا کہ اس بار بھارت پوری جنگی تیاری کے ساتھ کارروائی کرے گا۔
تفصیلات کے مطابق معرکہ حق میں شکست کے بعد اپنی عوام کو مطمئن کرنے کیلئے بھارتی سیاسی وعسکری قیادت کی گیدڑ بھبکیاں جاری ہے کیونکہ آپریشن سندور میں منہ کی کھانے کے بعد بھارت عالمی سطح پر شرمندہ اور بوکھلاہٹ کا شکار ہو چکا ہے۔
اقتدار پر قابض مودی نے حسب روایت بہار انتخابات سے قبل پاکستان دشمنی کا سہارا لیا ، بھارت کی شکست خوردہ عسکری قیادت کے حالیہ بیانات نےخطےکےامن کو دوبارہ داؤ پر لگا دیا ہے۔
راجستھان کے ضلع انوپ گڑھ میں فوجی جوانوں سے خطاب کرتے ہوئے بھارتی آرمی چیف جنرل اپیندر دیویڈی نے پاکستان کے خلاف نہایت سخت بیان دیتے ہوئے کہا ہے کہ اگر پاکستان نے ریاستی سرپرستی میں دہشت گردی بند نہ کی تو بھارت اس کا جغرافیائی وجود مٹا دے گا۔
جنرل دیویڈی نے آپریشن سندور کے دوسرے مرحلے کے آغاز کا اشارہ دیتے ہوئے کہا کہ دوسرے مرحلے کا آغاز کسی بھی وقت کیا جا سکتا ہے اور اس بار بھارت پوری جنگی تیاری کے ساتھ کارروائی کرے گا۔
آرمی چیف نے کہا اس بار ہم وہ ضبط نہیں دکھائیں گے ،جو آپریشن سندور 1.0 کے دوران دکھایا تھا۔ اس بار ہم ایسا اقدام کریں گے کہ پاکستان کو سوچنا پڑے گا کہ آیا وہ دنیا کے نقشے پر رہنا چاہتا ہے یا نہیں۔
جنرل دیویڈی نے فوجی جوانوں کو مخاطب کرتے ہوئے مزید کہا کہ وہ ہر وقت تیار رہیں۔ “اگر خدا نے چاہا تو جلد آپ کو موقع ملے گا، آل دی بیسٹ۔”
یہ بیان اس وقت سامنے آیا ہے جب اسی روز بھارتی ائیر چیف مارشل اے پی سنگھ نے دعویٰ کیا تھا کہ مئی میں ہونے والے آپریشن سندور کے دوران بھارتی فضائیہ نے پاکستان کے 4 سے 5 لڑاکا طیارے، جن میں امریکی ساختہ ایف-16 اور چینی جے ایف-17 بھی شامل تھے، مار گرائے۔
بھارت کی سیاسی وعسکری قیادت کی گیدڑ بھبکیاں معرکہ حق کی شکست کو چھپانے کی ناکام کوشش ہیں ، بھارتی قیادت کویہ سمجھناہوگاکہ پاکستان کسی بھی جارحیت کا جواب دینےکی بھرپورصلاحیت رکھتا ہے۔
تاہم پاکستان کی مسلح افواج کادوٹوک موقف ہےکہ بھارتی جارحیت کاجواب معرکہ حق سے بھی زیادہ سخت ہوگا
