بہار میں بڑی تعداد میں ووٹرز گھروں سے باہر آئے اور ریکارڈ ٹرن آؤٹ رہا۔
مودی حکومت جس نے کئی بار برازیلین ماڈل سے بھی ووٹ کاسٹ کروائے ہیں اس بار اسے جعلی ووٹ کاسٹ کرنے میں مشکلات کا سامنا ہے کیوں کہ ریاست بہار میں اس بار کافی بڑی تعداد میں ووٹرز اپنا حق رائے دہی استعمال کرنے نکلے ہیں جس سے جعلی ووٹوں کا تعداد کم ہونے کا امکان ظاہر کیا جارہا ہے۔
میڈیا رپورٹس کے مطابق بھارتی ریاست بہار میں ووٹنگ صبح 7 بجے شروع ہوئی اور دن بھر جاری رہی، اس بار بہار میں شام 5 بجے تک ووٹر ٹرن آؤٹ 67.14 فیصد تک پہنچ گیا ہے۔
ریاست بہار میں اسمبلی انتخابات کے دوسرے مرحلے کے لیے منگل کو 45,399 بوتھوں پر پولنگ شروع ہوئی، جس میں ریاست بھر کے 122 حلقوں کا احاطہ کیا گیا۔
الیکشن کمیشن کے مطابق اس مرحلے میں 3 کروڑ سے زائد ووٹرز اپنا حق رائے دہی استعمال کریں گے جو 1302 امیدواروں کی قسمت کا فیصلہ کرے گا۔ رائے دہندگان میں 1.95 کروڑ مرد ووٹرز، 1.74 کروڑ خواتین ووٹرز، اور 943 تیسری جنس کے ووٹر شامل ہیں۔
ریاست میں پُرامن پولنگ کو یقینی بنانے کے لیے سینٹرل ریزرو پولیس فورس کی 1500 سے زیادہ کمپنیاں، بہار اسپیشل آرمڈ پولیس کی 50 کمپنیاں، تقریباً 20,000 ٹرینی کانسٹیبل اور 22,000 ہوم گارڈ اہلکار اور چوکیدار تعینات کیے گئے ہیں۔
خیال رہے کہ بہار میں ہونے والے الیکشن کے سلسلسے میں تمام نشستوں کے نتائج کا اعلان 14 نومبر 2025 کو کیا جائے گا۔
