امریکی صدر  ڈونلڈ ٹرمپ کا فلسطینی مزاحمتی تنظیم حماس کو جلد غیر مسلح ہونے کا پیغام

واشنگٹن(15 اکتوبر 2025): امریکی صدر  ڈونلڈ ٹرمپ نے ایک بار  پھر فلسطینی مزاحمتی تنظیم حماس کو  جلد غیر  مسلح ہونے کا پیغام دیدیا۔
ٹرمپ نے وائٹ ہاؤس میں ارجنٹائن کے صدر خاویئر میلی کے ساتھ ملاقات کے دوران کہا کہ “اگر حماس ہتھیار نہیں ڈالتے، تو ہم انہیں غیر مسلح کریں گے، یہ عمل تیزی سے اور شاید پرتشدد طریقے سے ہوگا۔”
ٹرمپ نے کہا کہ “میں نے حماس سے بات کی اور کہا کہ تم ہتھیار ڈالو گے، ٹھیک ہے؟ جس پر وہ راضی ہوگئے اور کہا ہم ہتھیار ڈالیں گے، اگر وہ نہیں ہوتے تو ہم کردیں گے۔
صدر  ڈونلڈ ٹرمپ نے خبردار کیا کہ  اگر حماس نے معاہدے پر عمل نہ کیا تو  واشنگٹن خود اقدمات کرے گا، انہوں نے کہا کہ  حماس کو  غیر مسلح کرنا تیزی سے اور  ممکنہ طور  پر طاقت کے استعمال سے ہوگا۔
امریکی صدر نے اس سے قبل بھی حماس کو دھمکی دیتے ہوئے کہا تھا  کہ اگر حماس نے اقتدار نہ چھوڑا تو اسے صفحہ ہستی سے مٹادیا جائے گا۔
دوسری جانب امریکی صدر ڈونلڈ ٹرمپ نے غزہ جنگ بندی منصوبے کے دوسرے مرحلے کا اعلان کر دیا ہے، واشنگٹن سے خبر ایجنسی کے مطابق صدر ٹرمپ نے کہا کہ اسرائیل کے تمام 20 یرغمالی واپس آگئے ہیں۔
انہوں نے کہا کہ ابھی کام مکمل نہیں ہوا۔ ہلاک مغویوں کی لاشیں واپس نہیں آئی ہیں جیسا کہ وعدہ کیا گیا تھا، امریکی صدر کا مزید کہنا تھا کہ غزہ جنگ بندی کا دوسر مرحلہ اب شروع ہو رہا ہے۔