امریکا میں اخراجات کا بل منظور نہ ہونے سے حکومت کا کام روک دیا گیا ہے، متعدد محکموں کو بند کردیا گیا ہے، اسی حوالے سے ایک ٹی وی پروگرام میں جاری مباحثے کے دوران اینکر اپنی اہلیہ پر لائیو شو کے دوران برس پڑا۔
غیر ملکی ذرائع ابلاغ کے مطابق امریکا میں یہ شٹ ڈاؤن سینیٹ کی جانب سے عارضی فنڈنگ بل مسترد کرنے کے بعد شروع ہوا، اس معاملے کا ڈیموکریٹس اور ریپبلکن نے ایک دوسرے کو ذمہ دار ٹھہرا نا شروع کردیا۔
رپورٹس کے مطابق مشہور شو مارننگ جو کے شریک میزبان اور صحافی جو اسکاربرو اپنی اہلیہ اور میزبان میکا بریژنسکی پر حکومتی شٹ ڈاؤن پر بحث کے دوران براہِ راست نشریات کے دوران سیخ پا ہوگئے۔
میکا بریژنسکی کا کہنا تھا کہ ڈیموکریٹس کو قصور وار نہیں ٹھہرایا جا سکتا کیونکہ ریپبلکنز جھوٹ پھیلا نے میں مصروف ہیں اور میڈیا پلیٹ فارمز پر ان کا بیانیہ بغیر کسی احتساب کے نشر کیا جاتا ہے۔
یہ بات سن کر اسکاربرو غصے میں میں آگئے اور کہا کہ ڈیموکریٹس کو لڑنا چاہیے! وہ ہمیشہ ریپبلکنز کو سیاسی طور پر شکست دے سکتے ہیں، جیسے بل کلنٹن اور باراک اوباما نے کیا۔
بریژنسکی نے جواب دیا: کیا اس کا مطلب یہ ہے کہ وہ بھی جھوٹ بولیں؟ جس پر اسکاربرو نے مزید کہا کہ ڈیموکریٹس بار بار ریپبلکن بیانیے کا جواب دینے میں ناکام رہے ہیں اور وہ اب بھی شکایت کرتے ہیں لیکن حکمتِ عملی پیش نہیں کی جاتی۔
واضح رہے کہ لائیو شو کے دوران یہ معاملہ اس وقت ہوا جب امریکی کانگریس شارٹ ٹرم فنڈنگ بل پر اتفاق کرنے میں ناکام رہی اور بدھ کی رات 12 بجے وفاقی حکومت جزوی طور پر بند ہو گئی۔
