اسلام آباد : ڈیڑھ سال میں ادویات کی قیمتوں میں غیر ضروری طور پر 25 فیصد سے زائد کے اضافے کا انکشاف سامنے آیا۔
تفصیلات کے مطابق حکومت نے وزیراعظم کی ہدایت پر ادویات کی قیمتوں اور دستیابی سے متعلق مارکیٹ سروے مکمل کرلیا۔ ذرائع نے بتایا کہ وزارت صحت نے پوسٹ ڈی ریگولیشن میڈیسن پرائس سروے رپورٹ وزیراعظم آفس کو ارسال کردی۔
ذرائع کا کہنا تھا کہ سروے میں غیر ضروری ادویات کی قیمتوں میں نمایاں اضافہ کی تصدیق ہوئی ہے، جبکہ ڈیڑھ سال کے دوران ان ادویات کی قیمتیں 25 فیصد سے زائد بڑھ گئیں۔
رپورٹ میں کہنا تھا کہ سروے کے دوران ٹاپ 100 غیر ضروری ادویات کی قیمتیں، دستیابی، اور ریگولیشن کے اثرات کا جائزہ لیا گیا
۔ یہ سروے صوبائی دارالحکومتوں، دو چھوٹے شہروں، شہری و دیہی علاقوں کی فارمیسیز، اسپتالوں اور ڈسٹری بیوٹرز سے حاصل کردہ ڈیٹا کی بنیاد پر تیار کیا گیا۔
ذرائع نے کہا کہ وزارت صحت نے رپورٹ عالمی ادارہ صحت (ڈبلیو ایچ او) کو بھی ارسال کر دی ہے، جس نے پوسٹ ڈی ریگولیشن میڈیسن پرائس سروے پر اپنی رائے دی ہے۔
رپورٹ کے مطابق حکومت کی جانب سے میڈیسن پرائسز کو دوبارہ ریگولیٹ کرنے یا ڈی ریگولیٹ رکھنے کے فیصلے کا امکان جلد ہے۔
