تیلگو فلم انڈسٹری کی معروف اداکارہ رشمیکا مندانا نے منگنی کر کے اپنے لاکھوں مداحوں کو سرپرائز دے دیا۔
انڈین میڈیا کے مطابق رشمیکا مندانا اور تیلگو فلموں کے اسٹار وجے دیوراکونڈا نے اپنے رشتے کو آگے بڑھاتے ہوئے نجی تقریب میں منگنی کر لی، جوڑے کے بارے میں طویل عرصے سے ڈیٹنگ کی افواہیں تھیں۔
تقریب میں صرف قریبی دوستوں اور خاندان والوں نے شرکت کی جبکہ اسے میڈیا کی نظروں سے دور رکھا گیا۔ اگرچہ رشمیکا مندانا اور وجے دیوراکونڈا نے اس خبر کی تصدیق نہیں کی مگر میڈیا رپورٹس سے پتا چلتا ہے کہ دونوں فروری 2026 میں شادی کرنے کا ارادہ بھی رکھتے ہیں۔
حال ہی میں رشمیکا مندانا نے انسٹاگرام پر ایک پوسٹ شیئر کی جس نے مداحوں کی خوب توجہ حاصل کی۔ پوسٹ میں اداکارہ خوبصورت روایتی ساڑھی میں نظر آئیں، پوسٹ نے ان قیاس آرائیوں کو جنم دیا کہ یہ تصاویر منگنی کی تقریب کے دوران لی گئی ہیں۔
پوسٹ کے کیپشن میں اداکارہ نے لکھا کہ میں بہت شکرگزار ہوں کیونکہ آپ سب نے تھما ٹریلر اور ہمارے گانے پر بہت سارا پیار نچھاور کیا ہے، آپ کے پیغامات، آپ کا جوش، آپ کی مسلسل حمایت، آپ ہر لمحے کو میرے لیے بڑا اور خوشگوار بناتے ہیں اور میں پروموشنز کے دوران آپ سب سے جلد ملنے کیلیے بے تاب ہوں۔
رشمیکا مندانا فی الحال آدتیہ سرپوتدار کی ہارر-کامیڈی فلم ’تھما‘ کی ریلیز کیلیے تیاری کر رہی ہیں جس میں ایوشمن کھرانہ، نوازالدین صدیقی اور پریش راول بھی شامل ہیں۔ یہ فلم 21 اکتوبر 2025 کو سینما گھروں میں ریلیز ہوگی۔
انہوں نے ’کاک ٹیل 2‘ کی شوٹنگ بھی مکمل کر لی ہے جس میں وہ کرتی سینن اور شاہد کپور کے ساتھ نظر آئیں گی۔
دریں اثنا، وجے دیوراکونڈا آخری بار گوتم تنانوری کی جاسوسی تھرلر ’کنگڈم‘ میں نظر آئے تھے۔ جوڑا مبینہ طور پر راہول سنکریتین کی ہدایت کاری میں ایک آنے والی فلم پر بھی ایک ساتھ کام کر رہا ہے جو کہ ایک اور آن اسکرین ری یونین ہے جس کا مداح بے صبری سے انتظار کر رہے ہیں۔
