اسلام آباد: مسلم لیگ (ن) اور پاکستان تحریک انصاف نے نئے صوبوں کی تشکیل، بالخصوص جنوبی پنجاب صوبے کے قیام، پر اتفاق رائے کا اظہار کیا ہے۔
جیو نیوز کے ایک پروگرام میں گفتگو کرتے ہوئے وفاقی وزیر برائے دفاعی پیداوار رضا حیات ہراج نے کہا کہ ملک میں نئے صوبے ضرور بنیں گے۔ ان کا کہنا تھا کہ وزیراعظم شہباز شریف اپنی آئینی مدت پوری کریں گے اور نئے صوبوں کی تشکیل کا عمل بھی انہی کی قیادت میں آگے بڑھے گا۔
دوسری جانب پاکستان تحریک انصاف کے چیف وہپ ملک عامر ڈوگر نے بھی نئے صوبوں کے قیام کی حمایت کرتے ہوئے کہا کہ جنوبی پنجاب صوبے کے قیام پر وسیع اتفاق موجود ہے۔ انہوں نے کہا کہ سب سے پہلے جنوبی پنجاب کو الگ صوبہ بنایا جانا چاہیے، جبکہ مستقبل میں نئے صوبوں کی تشکیل آبادی کی بنیاد پر کی جانی چاہیے۔
