اداکارہ و ٹی وی میزبان مشی خان ن کا اداکارہ صبا قمر کے کراچی سے متعلق بیان پر شدید ردعمل

پاکستان کی اداکارہ و ٹی وی میزبان مشی خان نے اداکارہ صبا قمر کے کراچی سے متعلق بیان پر شدید ردعمل کا اظہار کیا ہے۔
صبا قمر پاکستان کی سب سے بڑی اسٹار ہیں۔ انہوں نے ڈراموں اور فلموں میں کامیابی حاصل کی، اداکارہ نے بھارت میں بھی کام کیا اور وہ اپنے پہلے ہی کردار سے بہترین اداکارہ کے لیے نامزدگی حاصل کرنے میں کامیاب رہی۔ انہوں نے بیک ٹو بیک ہٹ فلمیں دی ہیں۔
صبا قمر نے حال ہی میں گرین پرائم کو ایک انٹرویو دیا اس دوران اداکارہ نے اپنے پسندیدہ شہر اور رہائش کے بارے میں گفتگو کی تھی۔
پوڈکاسٹ میں ان سے سوال کیا گیا تھا کہ کیا آپ کام کے لیے کراچی منتقل ہونے کے لیے تیار ہیں؟ تو صبا قمر نے فوراً جواب دیا کہ استغفراللّٰہ کبھی نہیں۔
صبا قمر کے کراچی سے متعلق بیان پر واویلا مچ گیا
انہوں نے کہا کہ خیر، انسان کبھی نہیں جانتا کہ مستقبل میں کیا ہو، لیکن میں کراچی میں صرف کام کے لیے جاتی ہوں، اپنا کام مکمل کرتی ہوں اور واپس آجاتی ہوں، مجھے لاہور اور اسلام آباد پسند ہیں، اگر کوئی کراچی میں مجھے گھر لے دے تو ٹھیک حالانکہ میں نے وہاں اپنا ایک گھر بنا بھی لیا ہے۔
انہوں نے کہا کہ آہستہ آواز میں کہا کہ مجھے کراچی پسند نہیں۔ تمام پروجیکٹس جو کراچی میں شوٹ ہورہے ہیں انہیں اسلام آباد منتقل کردینا چاہیے، اداکارہ کے اس بیان پر مداحوں نے بھی اداکارہ پر برہمی کا اظہار کیا۔
جبکہ اب پاکستان کی اداکارہ و ٹی وی ہوسٹ مشی خان کا بیان بھی سامنے آگیا ہے، انسٹاگرام پر شیئر کی گئی ویڈیو میں مشی خان نے کہا کہ مجھے صبا قمر کی بات بالکل بھی اچھی نہیں لگی۔
مشی خان نے کہا کہ کراچی میرا آبائی شہر ہے، کراچی کی وجہ سے لاہور کے فنکاروں کو مقبولیت، عزت، پیسہ اور ان کے فن کو دنیا بھر میں پہچان ملی، صبا قمر نے کئی ایسے چینلز کے ڈراموں میں کام کیا ہے جو کراچی میں ہیں، اور وہ بھارت میں بھی کام کرچکی ہیں۔
ان کا کہنا تھا کہ بھارت کے شہر ممبئی میں بھی بہت مسائل ہیں جیسے چھوٹے گھر اور ہوا کی کمی لیکن کبھی کسی بھارتی فنکار نے ممبئی کے لیے اس طرح کے الفاظ استعمال نہیں کیے۔
مشی خان نے مزید کہا کہ فنکاروں کو چاہیے کہ وہ ایسے الفاظ استعمال کرنے میں محتاط رہیں، خاص طور پر ایسے شہر کے بارے میں جس نے انہیں شہرت اور مالی فائدہ دیا ہے۔
ان کا کہنا تھا کہ اگر صبا قمر کو کراچی پسند نہیں تھا تو وہ استغفراللہ کے بجائے کوئی اور مناسب متبادل الفاظ بھی استعمال کرسکتی تھیں، تمام شہر اچھے ہیں اور کسی شہر کے بارے میں منفی الفاظ استعمال نہیں کرنے چاھئیں ۔