پاکستان کی معروف اداکارہ صبا قمر زمان نے اپنے خلاف مقدمے کی درخواست سامنے آنے کے بعد پہلی بار ردِعمل دے دیا ہے۔
میڈیا رپورٹس کے مطابق صبا قمر کے خلاف لاہور کی سیشن کورٹ میں ایک درخواست دائر کی گئی ہے، جس میں الزام لگایا گیا ہے کہ اداکارہ نے بغیر اجازت پولیس کی وردی پہنی۔ یہ معاملہ اس وقت منظرِ عام پر آیا جب سوشل میڈیا پر ایک ویڈیو گردش کرنے لگی، جس میں صبا قمر کو ڈریسنگ روم میں ایس پی کی وردی پہنے دیکھا گیا۔
بعد ازاں ایک میگزین کی جانب سے اداکارہ کے حق میں پوسٹ شیئر کی گئی، جسے صبا قمر نے بھی ری شیئر کیا۔ میگزین کے ایڈیٹر ان چیف نے طنزیہ انداز میں لکھا کہ کیا یہ توقع کی جا رہی تھی کہ وہ پولیس افسر کا کردار کسی اور لباس میں ادا کریں گی۔
اس پر صبا قمر نے مزاحیہ انداز اپناتے ہوئے ردِعمل دیا اور لکھا کہ “اوہ خدایا! آج کل میں بہت زیادہ مشہور ہو گئی ہوں”، جس کے ساتھ انہوں نے مسکراتے ہوئے ایموجیز بھی شامل کیے۔
