پاکستان تحریک انصاف نے گلگت بلتستان کے انتخابات کو مسترد کرتے ہوئے مبینہ دھاندلی کے خلاف احتجاج اور وائٹ پیپر جاری کرنے کا اعلان کر دیا ہے۔ چیئرمین پی ٹی آئی بیرسٹر گوہر نے پریس کانفرنس میں کہا کہ یہ انتخابات جعلی اور دھاندلی زدہ ہیں، جبکہ حلف برداری کے دن گلگت بلتستان میں یومِ سیاہ منایا جائے گا۔
انہوں نے دعویٰ کیا کہ پارٹی کے پاس تین حلقوں کے فارم 47 موجود ہیں اور آٹھ نشستوں پر واضح کامیابی کے باوجود نتائج تبدیل کیے گئے۔ بیرسٹر گوہر کا کہنا تھا کہ ووٹ میں ہیرا پھیری اور عوام کو حقِ رائے دہی کے آزادانہ استعمال سے روکنا جمہوریت کے خلاف سازش ہے۔ ان کے مطابق پری پول دھاندلی کے ذریعے پی ٹی آئی کو انتخابی عمل سے باہر رکھنے کی کوشش کی گئی۔
