کراچی میں آئندہ 24 گھنٹوں کے دوران موسلا دھار بارش کا امکان ظاہر کیا گیا ہے جبکہ بعض علاقوں میں ژالہ باری بھی ہو سکتی ہے۔
محکمہ موسمیات کے مطابق شہر کا زیادہ سے زیادہ درجہ حرارت 31 سے 33 ڈگری سینٹی گریڈ کے درمیان رہنے کا امکان ہے، جبکہ ہوا میں نمی کا تناسب 88 فیصد ریکارڈ کیا گیا ہے۔ ہوائیں 8 کلومیٹر فی گھنٹہ کی رفتار سے چل رہی ہیں۔
محکمہ موسمیات کا کہنا ہے کہ ملک میں 25 مارچ سے مغربی ہواؤں کا نیا سلسلہ داخل ہونے کا امکان ہے، جس کے باعث کراچی میں کل شام سے بارش شروع ہو سکتی ہے۔
مزید بتایا گیا ہے کہ کراچی میں 25 اور 26 مارچ کو بارش کے امکانات ہیں جبکہ 28 اور 29 مارچ کو بھی بارش ہو سکتی ہے۔ شہر کے مختلف علاقوں میں تیز اور موسلا دھار بارش کے ساتھ بعض مقامات پر ژالہ باری کا بھی امکان ہے۔
محکمہ موسمیات نے شہریوں کو موسمی صورتحال کے پیش نظر احتیاطی تدابیر اختیار کرنے کی ہدایت کی ہے۔
