پی آئی اے بوئنگ طیارہ برطانوی فلائٹ آپریشن کیلئےتیار

کراچی : قومی ایئرلائن (پی آئی اے) نےبوئنگ 777طیارہ برطانوی فلائٹ آپریشن کیلئےتیار کرلیا ، پانچ سال بعد پہلی پرواز 25 اکتوبر کو روانہ ہوگی۔
تفصیلات کے مطابق قومی ایئرلائن پاکستان انٹرنیشنل ایئرلائن (پی آئی اے) نے برطانیہ کے لیے پروازوں کی بحالی کی تمام تیاریاں مکمل کرلی ہیں۔
پانچ سال کے وقفے کے بعد پی آئی اے کی پہلی پرواز 25 اکتوبر کو اسلام آباد سے مانچسٹر کے لیے روانہ ہوگی۔
ترجمان نے بتایا کہ پرواز کی روانگی سے قبل اسلام آباد انٹرنیشنل ایئرپورٹ پر ایک خصوصی تقریب منعقد کی جائے گی جس کے مہمانِ خصوصی وزیر دفاع خواجہ آصف ہوں گے۔
ترجمان کا کہنا تھا کہ برطانوی فلائٹ آپریشن کے لیے بوئنگ 777 طیارہ مکمل طور پر تیار کر لیا گیا ہے، جب کہ پی آئی اے کی ایک خصوصی ٹیم برطانیہ میں انتظامات اور حفاظتی معیار کا جائزہ لینے کے لیے موجود ہے۔
ایئر لائن حکام نے کہا کہ قومی ایئرلائن برطانیہ کے لیے فلائٹ آپریشن کے لیے مکمل طور پر تیار ہے، اور اس بحالی سے نہ صرف بیرونِ ملک مقیم پاکستانیوں کو سہولت ملے گی بلکہ قومی ایئرلائن کی آمدنی میں بھی نمایاں اضافہ متوقع ہے۔