امریکی صدر ڈونلڈ ٹرمپ نے کہا ہے کہ وہ پاکستان کا بہت احترام کرتے ہیں اور پاکستان کے فیلڈ مارشل اور وزیراعظم بہت اچھے اور قابل احترام ہیں۔
امریکی میڈیا سے گفتگو کرتے ہوئے ٹرمپ نے دعویٰ کیا کہ انہوں نے 8 جنگیں رکوا دیں، جن میں پاکستان اور بھارت کے درمیان جنگ بھی شامل ہے۔
انہوں نے کہا کہ پاکستان اور بھارت کے درمیان کشیدگی جوہری جنگ کی طرف بڑھ رہی تھی، جبکہ اس دوران 11 جہاز گرائے گئے تھے۔ ٹرمپ کے مطابق پاکستان کے وزیراعظم نے انہیں بتایا کہ انہوں نے لاکھوں لوگوں کی جانیں بچائیں۔
ایران سے متعلق گفتگو میں امریکی صدر نے کہا کہ ایران جنگ جلد ختم ہو جائے گی اور امریکا فاتح ہوگا۔ ان کا کہنا تھا کہ اگر ایران بات کرنا چاہتا ہے تو وہ امریکا کو فون کرسکتا ہے اور معاملات فون پر طے کیے جا سکتے ہیں۔
ٹرمپ نے مزید کہا کہ ایران کے افزودہ یورینیم کا معاملہ مذاکرات کا حصہ ہے اور امریکا اسے حاصل کرے گا۔
نیٹو کے حوالے سے انہوں نے کہا کہ ایران کے معاملے میں نیٹو امریکا کے ساتھ نہیں تھا، جبکہ جنگ ختم ہونے کے بعد برطانیہ نے جہاز بھیجنے کی بات کی، جو مناسب اقدام نہیں تھا۔
