اسلام آباد: قومی ایئرلائن پاکستان انٹرنیشنل ایئرلائنز (پی آئی اے) کو نجی کنسورشیم کے ممکنہ ٹیک اوور سے قبل ایک اہم مرحلے کا سامنا ہے، جہاں ایئرلائن کا بین الاقوامی آپریشنل اور سیفٹی آڈٹ کیا جائے گا۔
ذرائع کے مطابق پی آئی اے کا سخت ترین بین الاقوامی سیفٹی آڈٹ 8 جون سے شروع ہوگا، جبکہ انٹرنیشنل ایئر ٹرانسپورٹ ایسوسی ایشن (آئی اے ٹی اے) کی خصوصی ٹیم آڈٹ کے لیے اتوار کو پاکستان پہنچے گی۔
اطلاعات کے مطابق اس مرتبہ پی آئی اے کا رسک بیسڈ آڈٹ کیا جائے گا، جس کے دوران آئی اے ٹی اے کی ٹیم ایئرلائن کے تمام شعبوں، آپریشنز، حفاظتی اقدامات، دستاویزی ریکارڈ اور انتظامی طریقہ کار کا تفصیلی جائزہ لے گی۔
ذرائع کا کہنا ہے کہ یہ بین الاقوامی سیفٹی آڈٹ پی آئی اے کی عالمی سطح پر سیفٹی درجہ بندی کے تعین میں اہم کردار ادا کرے گا اور مستقبل میں ایئرلائن کی ساکھ اور بین الاقوامی آپریشنز پر بھی اثرانداز ہو سکتا ہے۔
پی آئی اے انتظامیہ نے آڈٹ کی تیاریوں کو حتمی شکل دینا شروع کر دی ہے۔ سی ای او پی آئی اے نے تمام شعبوں کو ہدایت جاری کی ہے کہ ریکارڈ مکمل اور درست رکھا جائے، جبکہ سیفٹی پالیسی سے متعلق تمام مینوئلز کو بھی بروقت اپ ڈیٹ کیا جائے۔
ذرائع کے مطابق ملازمین کو بھی آڈٹ کے دوران درکار دستاویزات اور آپریشنل معلومات ہر وقت دستیاب رکھنے کی ہدایت کی گئی ہے تاکہ بین الاقوامی معیار کے مطابق آڈٹ کے عمل کو کامیاب بنایا جا سکے۔
