سندھ، بلوچستان، پنجاب، خیبرپختونخوا اور آزاد کشمیر کے مختلف شہروں میں تیز آندھی، موسلادھار بارش اور ژالہ باری کے باعث معمولات زندگی متاثر ہو گئے، جبکہ مختلف حادثات میں 4 افراد جاں بحق اور 19 زخمی ہو گئے۔
رپورٹس کے مطابق کندھ کوٹ کے نواحی گاؤں میں آسمانی بجلی گرنے سے ایک شخص جاں بحق اور 3 افراد زخمی ہو گئے۔ روجھان میں طوفانی آندھی کے باعث سولر پلیٹیں اڑ گئیں، جس کے نتیجے میں 2 افراد جان سے گئے جبکہ ایک شخص زخمی ہوا۔
صادق آباد میں شدید آندھی اور موسلادھار بارش نے بڑے پیمانے پر نقصان پہنچایا۔ تیز ہواؤں کے باعث درخت، سائن بورڈز، دیواریں اور بجلی کے پول گر گئے، جس سے 3 افراد زخمی ہو گئے۔
دوسری جانب ترجمان سیپکو کے مطابق طوفانی موسم کے باعث مختلف علاقوں میں بجلی کے ٹاورز، پولز اور ٹرانسمیشن لائنوں کو شدید نقصان پہنچا ہے۔ متاثرہ علاقوں میں بجلی کی فراہمی معطل ہونے کے بعد بحالی کے لیے فیلڈ ٹیمیں ہنگامی بنیادوں پر کام کر رہی ہیں۔
محکمہ موسمیات نے شہریوں کو غیر ضروری سفر سے گریز اور خراب موسم کے دوران احتیاطی تدابیر اختیار کرنے کی ہدایت کی ہے۔
