اسلام آباد: فیڈرل کورٹ مارشل کی جانب سے سابق ڈی جی آئی ایس آئی فیض حمید کو آفیشل سیکریٹ ایکٹ، اختیارات کے غلط استعمال اور پاکستان آرمی ایکٹ کی خلاف ورزی پر 14 برس قید کی سزا سنائے جانے کے بعد، انہوں نے ملٹری کورٹ کے فیصلے کے خلاف اپیل دائر کر دی ہے۔
لیفٹیننٹ جنرل (ر) فیض حمید کے وکیل میاں علی اشفاق نے تصدیق کی ہے کہ فوجی عدالت کی جانب سے سنائی گئی سزا کے خلاف 27 دسمبر کو اپیل دائر کی گئی۔ تاہم ان کا کہنا تھا کہ اپیل کی تفصیلات اس مرحلے پر ظاہر نہیں کی جا سکتیں۔
ذرائع کے مطابق اپیل پر قانونی عمل مکمل ہونے کے بعد متعلقہ فورمز پر سماعت متوقع ہے۔
قوانین کے مطابق فوجی عدالت کی جانب سے سنائی گئی سزا کے خلاف دائر اپیل کا جائزہ آرمی چیف کی جانب سے قائم کردہ کورٹ آف اپیلز لے گی۔ عدالتی جائزے کے بعد آرمی چیف کو یہ اختیار حاصل ہوگا کہ وہ اپیل کو منظور کریں، مسترد کریں، سزا معطل کریں یا اس میں رد و بدل کے احکامات جاری کریں۔
