خواتین کو بااختیار بنانے، محفوظ سفری سہولت فراہم کرنے اور ماحول دوست ٹیکنالوجی کو فروغ دینے کے لیے سندھ حکومت نے 10 ہزار مفت الیکٹرک بائیکس کی تقسیم کا عمل شروع کر دیا ہے۔ یہ اسکیم ورکرز ویلفیئر بورڈ کے تحت لانچ کی گئی ہے، جس کا مقصد خواتین کی خودمختاری اور سفری مسائل کا دیرپا حل فراہم کرنا ہے۔
وزیر محنت سندھ شاہد تھہیم نے اس منصوبے کا اعلان کرتے ہوئے بتایا کہ الیکٹرک بائیکس کے لیے رجسٹریشن کا عمل شروع کر دیا گیا ہے۔
وزیر محنت شاہد عبدالسلام تھہیم نے کہا کہ یہ اسکیم آلودگی کے اخراج میں کمی ، حفاظت میں بہتری اور خواتین کو افرادی قوت میں بااختیار بنائے گی
وزیر محنت کے مطابق، اس اسکیم کے تحت تمام قرعہ اندازی ڈیجیٹل نظام کے ذریعے مکمل طور پر شفاف انداز میں کی جائے گی جس میں کسی بھی انسانی مداخلت کی گنجائش نہیں ہو گی۔
وزیرمحنت کے مطابق قرعہ اندازی مکمل طور پر ڈیجیٹل نظام کے تحت ہوگی جس میں انسانی مداخلت کا کوئی امکان نہیں۔ اسکیم کے تحت 20 سے 45 سال کی خواتین صنعتی مزدور درخواست دینے کی اہل ہیں جبکہ 20 فیصد کوٹہ اقلیتی برادری کےلیے مختص ہے۔
وزیر محنت شاہد تھہیم نےمزید کہا کہ “خواتین ملک کی آبادی کا نصف سے زائد ہیں، اور ان کی ترقی کے بغیر پاکستان کی ترقی ممکن نہیں۔”یہ اسکیم نہ صرف سفری سہولت فراہم کرے گی بلکہ خواتین کے روزمرہ اخراجات میں بھی کمی لائے گی اور انہیں باوقار، محفوظ اور خودمختار بنائے گی۔
اقلیتوں کے لیے مخصوص کوٹے سے متعلق بات کرتے ہوئے، وزیر محنت نے کہا پاکستان کے پرچم کا سفید رنگ اقلیتوں کی قربانیوں کا اعتراف ہے۔ اس اسکیم میں ان کی شمولیت ان خدمات کا اعتراف ہے جو انہوں نے ملک کی تعمیر و ترقی میں پیش کیں۔
