بانی پی ٹی آئی کی اسپتال منتقلی کی درخواست پر نوٹس جاری

اسلام آباد: اسلام آباد ہائیکورٹ نے بانی پی ٹی آئی کو علاج کی غرض سے شفا اسپتال منتقل کرنے کی درخواست پر ریاست کو نوٹس جاری کر دیا۔ درخواست کی سماعت جسٹس ارباب محمد طاہر اور جسٹس خادم حسین سومرو نے رجسٹرار دفتر کے اعتراضات کے ساتھ کی، اس موقع پر لطیف کھوسہ، سلمان اکرم راجہ و دیگر وکلا عدالت میں پیش ہوئے۔ لطیف کھوسہ نے اسپتال منتقلی کی درخواست کل سماعت کے لیے مقرر کرنے کی استدعا کی، جس پر عدالت نے قرار دیا کہ کاغذات کی تیاری میں دو سے تین روز درکار ہوں گے اور ریاست کو نوٹس جاری کیا جا چکا ہے۔ عدالت نے مرکزی اپیل آئندہ ہفتے مقرر کرتے ہوئے فریقین کو تیاری کے ساتھ پیش ہونے کی ہدایت کی، جبکہ توشہ خانہ فوجداری مقدمہ 10 مارچ کو سماعت کے لیے مقرر کرنے کا حکم بھی دیا۔