بالی وڈ پر ایک بار پھر الزام عائد کیا جا رہا ہے کہ اس نے ایک مقبول پاکستانی ڈرامے کے او ایس ٹی کی دھن کو کاپی کر کے نیا گانا بنایا ہے، جس پر سوشل میڈیا صارفین سخت ردعمل دے رہے ہیں۔
یہ پہلا موقع نہیں ہے کہ بھارتی فلم انڈسٹری پر پاکستانی گانوں کو بغیر اجازت اور کریڈٹ کے استعمال کرنے کا الزام سامنے آیا ہو۔ ماضی میں بھی متعدد بار پاکستانی گیت بالی وڈ کی فلموں میں شامل کیے جا چکے ہیں۔
بالی وڈ کی نئی فلم پرم سندری کا گانا ڈینجر ریلیز ہوا ہے، جو پاکستان کے مقبول ڈرامے منت مراد کے او ایس ٹی لال سوٹ سے خاصی مشابہت رکھتا ہے۔
یاد رہے کہ منت مراد 2023 میں نشر ہوا تھا، جس میں اقراء عزیز، طلحہ چہور اور رابعہ کلثوم نے مرکزی کردار ادا کیے تھے، جبکہ اس کے گانے لال سوٹ کو ناظرین نے بہت پسند کیا تھا۔
ڈینجر میں بالی وڈ اداکار سدھارتھ ملہوترا اور جھانوی کپور نے پرفارم کیا ہے، لیکن گانے کی مماثلت نے پاکستانی مداحوں کو شدید تنقید پر مجبور کر دیا ہے۔
