کراچی کے علاقے عزیزآباد بلاک 8 میں نامعلوم مسلح افراد کی گھر میں گھس کر فائرنگ کے نتیجے میں ایک شخص جاں بحق جبکہ اس کا بیٹا شدید زخمی ہو گیا۔ پولیس کے مطابق دونوں کو فوری طور پر اسپتال منتقل کیا گیا، جہاں 65 سالہ سمیع الدین رحمانی کو عباسی شہید اسپتال میں مردہ قرار دے دیا گیا، جبکہ ان کے 28 سالہ بیٹے فصیح رحمانی کو مزید علاج کے لیے جناح اسپتال منتقل کیا گیا۔
ابتدائی تحقیقات کے مطابق دو موٹرسائیکلوں پر سوار چار مسلح ملزمان گھر میں داخل ہوئے، فائرنگ کی اور موقع سے فرار ہو گئے۔ پولیس کا کہنا ہے کہ زخمی کی حالت بیان دینے کے قابل نہیں، جس کے باعث واقعے کی تحقیقات احتیاط کے ساتھ آگے بڑھائی جا رہی ہیں۔
