سول سروسز اکیڈمی کی جانب سے تیار کردہ ایک جامع تقابلی پالیسی جائزہ رپورٹ میں انکشاف کیا گیا ہے کہ پاکستان میں ڈھائی کروڑ سے زائد بچے اب بھی اسکول سے باہر ہیں، جس کی بڑی وجوہات ناکافی فنڈنگ، غیر مربوط تعلیمی نظام اور کمزور طرزِ حکمرانی ہیں۔
رپورٹ میں بتایا گیا ہے کہ اگرچہ قومی تعلیمی ایکشن پلان 2026 کے تحت تمام صوبوں نے تعلیم کے فروغ کے لیے جامع روڈ میپس تیار کیے ہیں، تاہم اصل چیلنج پالیسی سازی نہیں بلکہ ان پر مؤثر انداز میں عملدرآمد کو یقینی بنانا ہے۔
رپورٹ کے مطابق 1990 کی دہائی سے 2010 کی دہائی تک بھی لاکھوں بچے تعلیمی نظام سے باہر رہے۔ جائزے میں پنجاب، سندھ، خیبرپختونخوا، بلوچستان، اسلام آباد، گلگت بلتستان اور آزاد جموں و کشمیر کی تعلیمی پالیسیوں کا مؤثریت، کارکردگی، مساوات، اخلاقیات اور قابلِ عمل ہونے کے مختلف پہلوؤں سے تجزیہ کیا گیا۔
رپورٹ میں مزید بتایا گیا ہے کہ ملک میں اسکول سے باہر بچوں کی تعداد تقریباً 2 کروڑ 51 لاکھ سے 2 کروڑ 60 لاکھ کے درمیان ہے، جو تعلیمی شعبے کے لیے ایک بڑا چیلنج ہے۔
