سابق قومی کرکٹ کپتان وسیم اکرم کی اہلیہ شنیرا اکرم نے سوشل میڈیا پر گردش کرنے والی جعلی خبروں اور مصنوعی ذہانت سے تیار کردہ ویڈیوز کی سختی سے تردید کر دی ہے، جن میں سابق قومی کپتان کی وفات کا جھوٹا دعویٰ کیا جا رہا تھا۔
افواہوں کا جواب دیتے ہوئے شنیرا اکرم نے اپنے سوشل میڈیا اکاؤنٹ پر ایک نئی ویڈیو شیئر کی، جس میں وسیم اکرم جم میں مختلف ورزشیں کرتے ہوئے دکھائی دے رہے ہیں۔ ویڈیو میں وہ رسی کے ذریعے کھینچنے والی ورزش، پل اپس اور باربل کے ساتھ فرش پر سینہ مضبوط کرنے کی ورزش سمیت متعدد مشقیں کرتے ہیں، جبکہ آخر میں کیمرے کی جانب مسکرا کر اپنی خیریت کا پیغام بھی دیتے ہیں۔
ویڈیو کے ساتھ شنیرا اکرم نے لکھا کہ یہ ریکارڈنگ سوشل میڈیا پر پھیلائی جانے والی جعلی خبروں اور مصنوعی ذہانت سے تیار کردہ ویڈیوز کے جواب میں شیئر کی جا رہی ہے۔ انہوں نے واضح کیا کہ جیسا کہ ویڈیو میں دیکھا جا سکتا ہے، وسیم اکرم بالکل خیریت سے ہیں اور اپنی معمول کی ورزش میں مصروف ہیں۔
