بلوچستان کے ضلع مستونگ کے علاقے کھڈ کوچہ میں سیکیورٹی فورسز نے دہشت گردوں کے خلاف کارروائی کرتے ہوئے 4 دہشت گرد ہلاک کر دیے۔
سیکیورٹی ذرائع کے مطابق ہلاک ہونے والے دہشت گرد فتنہ الہندوستان سے وابستہ تھے۔ کارروائی کے دوران بھاری مقدار میں اسلحہ، گولہ بارود اور دہشت گردوں کے زیرِ استعمال موٹرسائیکلیں بھی قبضے میں لے لی گئیں۔
ذرائع کا کہنا ہے کہ آپریشن کے دوران تنظیم کے متعدد دہشت گرد زخمی ہوئے، جبکہ ان کے سہولت کاروں میں ملوث کئی مشتبہ افراد کو بھی گرفتار کر لیا گیا ہے۔
سیکیورٹی ذرائع کے مطابق علاقے میں سرچ اور کلیئرنس آپریشن جاری ہے تاکہ کسی بھی ممکنہ خطرے کا مکمل خاتمہ یقینی بنایا جا سکے۔
دریں اثنا، وفاقی وزیرِ داخلہ محسن نقوی نے کامیاب کارروائی پر سیکیورٹی فورسز کو خراجِ تحسین پیش کرتے ہوئے ان کی پیشہ ورانہ مہارت، بہادری اور قربانیوں کو سراہا۔
