پاکستان کرکٹ بورڈ نے اگست میں چار ٹیموں پر مشتمل ایک روزہ ٹورنامنٹ کرانے کا فیصلہ کیا ہے، جس کے باعث قومی کرکٹرز کی بیرونِ ملک لیگز، خصوصاً کیریبیئن پریمیئر لیگ میں شرکت کے امکانات کم ہو گئے ہیں۔
ذرائع کے مطابق ٹورنامنٹ کے لیے کھلاڑیوں کے انتخاب کا عمل جاری ہے، جبکہ وائٹ بال کرکٹرز کو آگاہ کر دیا گیا ہے کہ اگست میں ہونے والے اس ایونٹ میں شرکت ان کے لیے لازمی ہوگی۔
کیریبیئن پریمیئر لیگ 7 اگست سے 20 ستمبر تک شیڈول ہے، تاہم اس میں شرکت کے لیے قومی کھلاڑیوں کو پاکستان کرکٹ بورڈ سے عدم اعتراض سرٹیفکیٹ درکار ہوگا۔ بورڈ کے حالیہ فیصلے کے بعد متعدد کھلاڑیوں کو این او سی ملنے کا امکان کم ہے۔
ذرائع کے مطابق معاذ صداقت کو پہلے این او سی جاری کیا جا چکا تھا، تاہم نئے فیصلے کے بعد ان کی شرکت بھی غیر یقینی ہو گئی ہے۔ اسی طرح صاحبزادہ فرحان، صائم ایوب، سفیان مقیم، سعد مسعود، عثمان خان اور سلمان ارشاد کو بھی این او سی نہ ملنے کا امکان ظاہر کیا جا رہا ہے۔
پاکستان کرکٹ بورڈ نے یہ فیصلہ آئندہ عالمی کپ کی تیاریوں کے پیش نظر کیا ہے تاکہ زیادہ سے زیادہ ایک روزہ میچز کے ذریعے ممکنہ کھلاڑیوں کا جائزہ لے کر مضبوط اسکواڈ تشکیل دیا جا سکے۔
