سندھ میں طوفانی بارشوں کا الرٹ جاری

کراچی : سندھ میں طوفانی بارشوں کا الرٹ جاری کردیا گیا، جس میں شہریوں کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔
تفصیلات کے مطابق محکمہ موسمیات نے سندھ میں اگلے 12 سے 24 گھنٹے کے دوران طوفانی بارشوں کا الرٹ جاری کردیا ہے
محکمہ کا کہنا ہے کہ سندھ پر اثر انداز ہونے والا مون سون سسٹم اب ڈیپ ڈپریشن میں تبدیل ہو گیا ہے، جو 100 ملی میٹر سے زائد بارش برسا سکتا ہے اور اربن فلڈنگ کا بھی خدشہ ہے۔
محکمہ موسمیات نے آگاہ کیا ہے ستمبر میں بھارت کی جانب سے ڈپریشن داخل ہونا غیر معمولی ہے اور ملیر ندی میں بارش کے باعث سیلابی صورتحال پیدا ہوسکتی ہے۔
این ڈی ایم اے کی جانب سے بھی سندھ کے جنوبی اضلاع میں تیز ہواؤں کے ساتھ شدید بارش کا امکان ظاہر کرتے ہوئے کہا گیا کہ کراچی اور گردونواح میں بھی موسلادھار بارش متوقع ہے۔
این ڈی ایم اے نے شہریوں کو غیر ضروری سفر سے گریز اور احتیاطی تدابیر اختیار کرنے کی ہدایت کردی ہے۔
دوسری جانب محکمہ آج اسلام آباد اور گردونواح میں جزوی ابر آلود موسم رہے گا جبکہ شہرِ اقتدار میں بارش ہونے کا 35 فیصد امکان ہے۔
پنجاب کے جنوبی اضلاع میں گرج چمک کے ساتھ بارش جبکہ بعض مقامات پر موسلادھار بارش کی پیشگوئی کی گئی ہے، لاہور، راولپنڈی، مری، گلیات اور فیصل آباد میں شام یا رات کو بارش متوقع ہے۔
ڈی جی خان اور مشرقی بلوچستان کے برساتی ندی نالوں میں طغیانی کا خطرہ ہے۔ محکمہ موسمیات نے خبردار کیا ہے کہ شدید آندھی اور بارش سے کمزور مکانات، بجلی کے کھمبوں اور بل بورڈز کو نقصان پہنچ سکتا ہے۔
خیبرپختونخوا کے سوات، دیر، کوہستان، مانسہرہ اور وزیرستان میں بھی بارش کا امکان ہے، جبکہ بلوچستان کے ژوب، لسبیلہ، خضدار، گوادر اور قلات میں بارش کے ساتھ بعض مقامات پر موسلادھار بارش ہوسکتی ہے۔
کشمیر اور گلگت بلتستان میں بھی شام یا رات کو بارش کی پیشگوئی ہے۔ گزشتہ 24 گھنٹوں کے دوران سب سے زیادہ بارش جھنگ میں 85 ملی میٹر ریکارڈ کی گئی۔