سری لنکا کے شہر نیگومبو کی جیل میں دو قیدی گروہوں کے درمیان ہونے والی خونریز جھڑپوں کے نتیجے میں کم از کم 19 قیدی ہلاک جبکہ 100 سے زائد زخمی ہو گئے۔
غیر ملکی خبر ایجنسی کے مطابق اتوار کے روز شروع ہونے والا تصادم رات تک قابو میں آ گیا تھا، تاہم پیر کو دونوں گروہوں کے درمیان ایک بار پھر شدید ہنگامہ آرائی شروع ہوگئی، جس کے نتیجے میں جانی نقصان میں اضافہ ہوا۔
حکام کے مطابق زخمی قیدیوں کو فوری طور پر نیگومبو کے اسپتال منتقل کیا گیا، جبکہ شدید زخمی افراد کو مزید علاج کے لیے دارالحکومت کولمبو کے اسپتالوں میں منتقل کیا جا رہا ہے۔
سری لنکن حکام نے واقعے کا نوٹس لیتے ہوئے جیل میں ہونے والی پرتشدد جھڑپ کی تحقیقات کا آغاز کر دیا ہے تاکہ واقعے کی وجوہات اور ذمہ دار عناصر کا تعین کیا جا سکے۔
