خیبرپختونخوا کے سرحدی علاقے دانا سر میں مسافر بس کھائی میں گرنے سے 40 افراد جاں بحق جبکہ متعدد زخمی ہو گئے۔
ضلعی انتظامیہ کے مطابق مسافر بس کوئٹہ سے پشاور جا رہی تھی کہ ژوب اور ڈیرہ اسماعیل خان کے درمیانی علاقے دانا سر میں افسوسناک حادثہ پیش آیا۔ معاون وزیراعلیٰ بلوچستان نے تصدیق کی ہے کہ حادثے میں 40 افراد جاں بحق اور 8 زخمی ہوئے۔
ڈپٹی کمشنر شیرانی ولی کاکڑ کے مطابق ریسکیو ٹیمیں دشوار گزار علاقے کے باوجود امدادی کارروائیوں میں مصروف ہیں اور زخمیوں کو نکال کر قریبی اسپتالوں میں منتقل کیا جا رہا ہے۔ انہوں نے کہا کہ انتظامیہ صورتحال کی مسلسل نگرانی کر رہی ہے اور حتمی اعداد و شمار امدادی کارروائیوں کے بعد سامنے آئیں گے۔
اسسٹنٹ کمشنر شیرانی کے مطابق بس میں 48 مسافر سوار تھے۔ محکمہ صحت نے قریبی اسپتالوں میں ایمرجنسی نافذ کر دی ہے۔
