پاکستان ٹیلی کمیونی کیشن اتھارٹی (پی ٹی اے) نے وضاحت کی ہے کہ جاز کی جانب سے صارفین سے کسی بھی قسم کا غیر قانونی یا اضافی ٹیرف وصول نہیں کیا گیا۔
پی ٹی اے کی جانب سے جاری اعلامیے میں کہا گیا ہے کہ سوشل میڈیا پر گردش کرنے والی اطلاعات غلط اور گمراہ کن ہیں۔ بیان میں واضح کیا گیا کہ مالی سال 2023-24 کے دوران جاز کی جانب سے جتنی بھی ٹیرف ایڈجسٹمنٹس کی گئیں، وہ پی ٹی اے کے مقرر کردہ ریگولیٹری فریم ورک کے مطابق اور باقاعدہ منظور شدہ تھیں۔
اتھارٹی کے مطابق آڈٹ حکام کو تمام منظوریوں کے مستند ریکارڈز فراہم کر دیے گئے ہیں تاکہ شفافیت برقرار رہے۔
پی ٹی اے نے کہا کہ وہ صارفین کے مفادات کے تحفظ اور ایک منصفانہ و شفاف ٹیلی کام نظام کی فراہمی کے لیے پرعزم ہے اور مسلسل آپریٹرز کے ٹیرف پر نگرانی رکھے ہوئے ہے تاکہ ریگولیٹری اصولوں کی مکمل پاسداری یقینی بنائی جا سکے۔
