نئی دہلی: بھارتی ریاست اتراکھنڈ میں شدید بارشوں کے باعث بڑے پیمانے پر لینڈ سلائیڈنگ ہوئی، جس کے نتیجے میں کم از کم 80 دیہات کا دیگر علاقوں سے زمینی رابطہ منقطع ہوگیا۔
بھارتی میڈیا کے مطابق ضلع رودر پریاگ میں ہونے والی موسلادھار بارش کے بعد متعدد رابطہ سڑکیں بند ہوگئیں، جس سے شہریوں کو آمدورفت اور بنیادی سہولیات کی فراہمی میں شدید مشکلات کا سامنا ہے۔
رپورٹس کے مطابق مسلسل بارشوں کے باعث الکنندا اور منداکنی دریاؤں میں پانی کی سطح بھی خطرناک حد تک بلند ہوگئی ہے۔ ضلعی انتظامیہ نے متعلقہ اداروں کو ہائی الرٹ رہنے کی ہدایت کرتے ہوئے دریا کنارے آباد مکینوں کو محفوظ مقامات پر منتقل کرنے کا عمل شروع کر دیا ہے۔
ادھر محکمہ موسمیات نے اتراکھنڈ سمیت بھارت کی متعدد ریاستوں میں مزید بارشوں کی پیش گوئی کی ہے، جس کے پیشِ نظر متعلقہ حکام کو احتیاطی اقدامات جاری رکھنے کی ہدایت کی گئی ہے۔
