خیبرپختونخوا کے ضلع بونیر میں افسوسناک حادثے کے دوران ایک گاڑی کھائی میں جاگری، جس کے نتیجے میں خواتین اور بچوں سمیت 5 افراد جاں بحق اور 6 زخمی ہو گئے۔
ریسکیو ذرائع کے مطابق یہ اندوہناک واقعہ بونیر کے علاقے گوکند غور درہ میں پیش آیا، جہاں ایک گاڑی بے قابو ہو کر گہری کھائی میں جا گری۔
حادثے کے بعد ریسکیو ٹیموں نے فوری طور پر موقع پر پہنچ کر امدادی کارروائیاں شروع کیں۔ زخمیوں کو ابتدائی طبی امداد دینے کے بعد ڈسٹرکٹ ہیڈکوارٹر (ڈی ایچ کیو) اسپتال منتقل کر دیا گیا ہے، جہاں ان کا علاج جاری ہے۔
ریسکیو حکام کے مطابق جاں بحق ہونے والوں میں خواتین اور بچے شامل ہیں۔ زخمیوں میں بھی بعض کی حالت تشویشناک بتائی جا رہی ہے۔
مقامی انتظامیہ نے واقعے کی تحقیقات شروع کر دی ہیں، جب کہ علاقے میں غم کی فضا قائم ہے۔
