ملتان: مشرقِ وسطیٰ میں بڑھتی کشیدگی کے باعث ایل پی جی گیس کا بحران شدت اختیار کر گیا ہے، جس کے اثرات پاکستان میں بھی نمایاں ہونے لگے ہیں۔ ملتان میں ایل پی جی کی قیمت میں 50 روپے اضافے کے بعد فی کلو نرخ 400 روپے تک پہنچ گئے ہیں۔
مارکیٹ ذرائع کے مطابق سپلائی میں کمی اور درآمدی قیمتوں میں اضافے کے باعث قیمتوں میں اضافہ ناگزیر ہو گیا ہے۔ دکانداروں کا کہنا ہے کہ پہلے ایک سلنڈر 12 ہزار روپے میں دستیاب تھا، جو اب بڑھ کر 16 ہزار روپے تک پہنچ چکا ہے، یعنی فی سلنڈر 4 ہزار روپے اضافہ ہو چکا ہے۔
فیکٹری مالکان کے مطابق جنگی صورتحال کے باعث ایل پی جی کی فراہمی متاثر ہو رہی ہے اور محدود دستیاب اسٹاک ہی مارکیٹ میں فراہم کیا جا رہا ہے۔ ایل پی جی ڈیلرز نے خبردار کیا ہے کہ موجودہ حالات برقرار رہے تو قیمتوں میں مزید اضافہ ہو سکتا ہے۔
دوسری جانب توانائی سپلائی لائن کے تسلسل کے لیے اہم پیشرفت سامنے آئی ہے۔ ایل پی جی اور کوئلے سے بھرے تین جہاز پاکستان پہنچ گئے ہیں اور پورٹ قاسم پر لنگر انداز ہو چکے ہیں۔
انتظامیہ کے مطابق “پی سی جی پیریکلس” جہاز عمان سے 3800 ٹن سے زائد ایل پی جی لے کر آیا ہے، جبکہ “نیویگیٹر ایریز” بحری جہاز عراق سے 11 ہزار 136 ٹن ایل پی جی لے کر پہنچا ہے۔ ایک جہاز سے آج مائع گیس آف لوڈ کی جائے گی جبکہ 52 ہزار میٹرک ٹن کوئلے کا جہاز بھی پورٹ قاسم پر آف لوڈ ہو رہا ہے۔
ماہرین کے مطابق نئی کھیپ سے وقتی ریلیف ممکن ہے، تاہم خطے میں کشیدگی برقرار رہی تو توانائی بحران مزید گہرا ہو سکتا ہے اور قیمتوں میں مزید اضافہ بھی خارج از امکان نہیں۔
