تہران: ایران نے جنگ بندی سے متعلق امریکی 15 نکاتی تجاویز کا باضابطہ جواب ارسال کر دیا ہے اور اب واشنگٹن کے ردعمل کا انتظار کیا جا رہا ہے۔
برطانوی خبر رساں ایجنسی کے مطابق ایک سینئر ایرانی عہدیدار نے کہا ہے کہ امریکی تجاویز یکطرفہ اور غیر منصفانہ ہیں اور ان میں صرف امریکا اور اسرائیل کے مفادات کو مدنظر رکھا گیا ہے۔
ایرانی حکام کے مطابق یہ تجاویز پاکستان کے ذریعے موصول ہوئیں جن کا تفصیلی جائزہ لینے کے بعد ایران نے اپنا مؤقف بھی پاکستان کے ذریعے ہی امریکا تک پہنچایا۔ ایران کا کہنا ہے کہ ان تجاویز میں اہم تقاضوں کی کمی ہے اور انہیں قابلِ قبول بنانے کیلئے مزید توازن کی ضرورت ہے۔
عہدیدار نے مزید کہا کہ اگر امریکا حقیقت پسندی کا مظاہرہ کرے تو مسئلے کا حل نکالا جا سکتا ہے، جبکہ سفارتکاری کا عمل بھی جاری ہے اور مکمل طور پر تعطل کا شکار نہیں ہوا۔
ایران نے یہ بھی واضح کیا کہ امریکی صدر ڈونلڈ ٹرمپ کی حالیہ دھمکی سے قبل ہی ان تجاویز کا باضابطہ جواب بھیج دیا گیا تھا۔
