امریکی صدر ڈونلڈ ٹرمپ کی انتظامیہ نے دنیا کے 60 تجارتی شراکت دار ممالک سے درآمد ہونے والی اشیا پر نئی ڈیوٹیاں عائد کر دی ہیں۔
برطانوی خبر رساں ادارے کے مطابق امریکا نے یہ اقدام ان ممالک میں جبری مشقت کے خلاف قوانین پر عملدرآمد میں مبینہ کمزوریوں کے باعث کیا ہے۔ نئی پالیسی کے تحت زیادہ تر ممالک کی مصنوعات پر 10 فیصد جبکہ بعض ممالک پر 12.5 فیصد اضافی ٹیرف لاگو کیا گیا ہے۔
امریکی حکام کا کہنا ہے کہ نئے اقدامات کا مقصد عالمی سپلائی چین میں جبری مشقت کے خاتمے اور امریکی کارکنوں کے مفادات کا تحفظ ہے۔ تاہم متعدد ممالک نے اس فیصلے پر تحفظات کا اظہار کرتے ہوئے اسے غیر منصفانہ قرار دیا ہے۔
نئے ٹیرف کا نفاذ ایسے وقت میں ہوا ہے جب ٹرمپ انتظامیہ کی جانب سے عائد عارضی 10 فیصد عالمی ٹیرف کی مدت ختم ہو چکی تھی۔ امریکی حکام کے مطابق نئی ڈیوٹیاں جمعہ کی رات 12 بج کر ایک منٹ سے نافذ ہوئیں، جبکہ راستے میں موجود سامان کو 28 جولائی تک رعایت دی گئی ہے۔
