اسلام آباد: جمعیت علمائے اسلام (جے یو آئی) کے سینیٹر کامران مرتضیٰ نے کہا ہے کہ آئین پاکستان میں نئے صوبوں کے قیام کی گنجائش موجود ہے اور اس حوالے سے آئینی طریقہ کار پہلے سے موجود ہے۔
اے آر وائی نیوز سے خصوصی گفتگو کرتے ہوئے کامران مرتضیٰ کا کہنا تھا کہ آئین میں نئے صوبے بنانے کی شق اسی مقصد کے لیے شامل کی گئی تھی تاکہ ضرورت پڑنے پر نئے انتظامی یونٹس قائم کیے جا سکیں۔
انہوں نے دعویٰ کیا کہ نئے صوبوں کے قیام کا فیصلہ ہو چکا ہے اور اس عمل میں الیکشن کمیشن کا کردار ہوگا، جبکہ عوامی رائے جاننے کے لیے ریفرنڈم بھی کرایا جائے گا۔
سینیٹر کامران مرتضیٰ نے مزید کہا کہ نئے صوبوں کے قیام کی صورت میں حد بندیوں اور انتخابی حلقوں سے متعلق اعتراضات سامنے آ سکتے ہیں، کیونکہ مختلف علاقوں اور قومیتوں کی اپنی الگ ترجیحات اور مطالبات ہو سکتے ہیں۔
