سینیٹر فیصل واوڈا نے سوشل میڈیا پر اپنے بیان میں الزام عائد کیا ہے کہ لاہور میں پیش آنے والے واقعے کو حکومت کی جانب سے دبانے کی کوشش کی جا رہی ہے۔
ان کے مطابق نائب وزیراعظم اور وزیر خارجہ اسحاق ڈار کے مبینہ قریبی رشتہ دار پر غیر ملکی خواتین کو پاکستان بلا کر مبینہ زیادتی، تشدد اور بھتہ خوری کے سنگین الزامات عائد ہوئے، جس کے بعد مبینہ طور پر متعلقہ غیر ملکی سفارتخانے کی مداخلت پر گرفتاری عمل میں آئی۔
فیصل واوڈا نے دعویٰ کیا کہ حکومت اس کیس کو زیادتی کے بجائے صرف بھتہ خوری تک محدود کرنے کی کوشش کر رہی ہے اور متاثرہ غیر ملکی خواتین کو جلد ملک سے واپس بھیجنے کی تیاری کی جا رہی ہے۔ ان کا کہنا تھا کہ 164 کا بیان اور دیگر میڈیکل ریکارڈز تاحال منظر عام پر نہیں آئے۔
انہوں نے مطالبہ کیا کہ اسحاق ڈار فوری طور پر استعفیٰ دیں اور اس معاملے کی شفاف تحقیقات کی جائیں۔
دوسری جانب پولیس ذرائع کے مطابق دو غیر ملکی خواتین کو مبینہ طور پر اغوا اور زیادتی کے الزام میں چار افراد کو گرفتار کیا گیا ہے، جبکہ ملزم اور خواتین کے درمیان کاروباری تنازع اور رقم کے معاملے کا پہلو بھی سامنے آیا ہے۔
