ٹیکنالوجی ڈیسک: سائنسدانوں نے ایک ایسا جدید سولر پینل تیار کیا ہے جو صرف سورج کی روشنی ہی نہیں بلکہ کمرے میں موجود مصنوعی روشنی سے بھی بجلی پیدا کرنے کی صلاحیت رکھتا ہے۔
غیر ملکی میڈیا کے مطابق یہ جدید سولر سیلز پیرووسکائٹ نامی مٹیریل سے تیار کیے گئے ہیں، جو روایتی سلیکون سولر پینلز کے مقابلے میں توانائی کو زیادہ مؤثر انداز میں بجلی میں تبدیل کرنے کی صلاحیت رکھتا ہے۔
رپورٹ کے مطابق تائیوان کی نیشنل یینگ منگ چیاؤ ٹنگ یونیورسٹی کے محققین نے ایک کیمیائی طریقہ استعمال کرتے ہوئے اس ٹیکنالوجی میں موجود خامیوں کو دور کیا، جس کے بعد یہ سولر سیلز روزمرہ استعمال کے لیے زیادہ موزوں ہو گئے ہیں۔ محققین کا کہنا ہے کہ اس ٹیکنالوجی سے ریموٹ کنٹرول، سینسرز اور پہننے والی اسمارٹ ڈیوائسز جیسے کم توانائی استعمال کرنے والے آلات کو چارج کیا جا سکے گا۔
