اسلام آباد: پاور ڈویژن نے صارفین کو مزید سہولت اور ریلیف فراہم کرنے کے لیے ملک بھر میں بجلی کے بلوں کا نیا اور آسان فارمیٹ متعارف کرا دیا ہے۔
وزارتِ توانائی کی ہدایت پر تمام ڈسکوز نے بجلی کے بلوں کا نیا ڈیزائن جاری کر دیا ہے، جس کا مقصد بلوں کو زیادہ سادہ، شفاف اور صارف دوست بنانا ہے تاکہ صارفین اپنی بلنگ سے متعلق معلومات باآسانی سمجھ سکیں۔
نئے فارمیٹ کے تحت صارفین بجلی کی کھپت، واجب الادا رقم، بل کی تفصیلات اور ادائیگی کی آخری تاریخ سمیت تمام اہم معلومات ایک ہی نظر میں واضح انداز میں دیکھ سکیں گے۔
حکام کے مطابق پرانے بلوں میں غیر ضروری معلومات، پیچیدہ ترتیب اور تکنیکی اصطلاحات شامل ہونے کے باعث عام صارفین کو مشکلات کا سامنا تھا۔ صارفین کی شکایات اور تجاویز کی روشنی میں بل کے ڈیزائن کو ازسرِنو ترتیب دیا گیا ہے۔
نئے بل میں معلومات کو منظم اور واضح انداز میں پیش کیا گیا ہے جبکہ بصری پیچیدگی کو بھی کم کیا گیا ہے تاکہ ہر طبقے سے تعلق رکھنے والے صارفین آسانی سے بل کو سمجھ سکیں۔
مزید برآں، جدید سہولت کے طور پر بل میں کیو آر کوڈ بھی شامل کیا گیا ہے، جس کے ذریعے صارفین اضافی معلومات اور مختلف ڈیجیٹل سروسز تک فوری رسائی حاصل کر سکیں گے۔
حکام کا کہنا ہے کہ نئے بلوں کا فارمیٹ صارفین اور مختلف اسٹیک ہولڈرز کی تجاویز کو مدنظر رکھتے ہوئے تیار کیا گیا ہے، جبکہ پاور سیکٹر میں شفافیت، بہتر خدمات اور اصلاحات کا عمل آئندہ بھی جاری رکھا جائے گا۔
