اسلام آباد میں صحت و غذائیت کانفرنس سے خطاب کرتے ہوئے وفاقی وزیر صحت مصطفیٰ کمال نے کہا ہے کہ پاکستان کا موجودہ ہیلتھ کیئر سسٹم دراصل ’سک کیئر سسٹم‘ بن چکا ہے، جو صرف بیماریوں کے علاج تک محدود ہے۔
انہوں نے کہا کہ بیماریوں کے انتظار کے بجائے ملک کو پریوینٹیو ہیلتھ کیئر ماڈل کی طرف جانا ہوگا تاکہ عوام کو بیماریوں سے بچایا جا سکے۔
وفاقی وزیر صحت کا کہنا تھا کہ صرف اسپتال بنانا اور ڈاکٹرز بھرتی کرنا کافی نہیں، بلکہ پورا نظام بدلنے کی ضرورت ہے، جبکہ عوام کو بھی صحت مند طرز زندگی اپنانا ہوگا۔
مصطفیٰ کمال نے کہا کہ تیزی سے بڑھتی آبادی صحت کے نظام پر اضافی بوجھ ڈال رہی ہے، اس چیلنج سے نمٹنے کے لیے آبادی پر قابو پانا بھی ضروری ہے۔
انہوں نے مزید کہا کہ کورونا وبا نے ثابت کیا کہ بڑے ممالک کے ہیلتھ سسٹمز بھی دباؤ میں آسکتے ہیں، دنیا کی کوئی سپر پاور ایک وقت میں تمام مریضوں کا بوجھ نہیں اٹھا سکتی۔
وزیر صحت کے مطابق عالمی ماہرین کی مدد سے نئی ہیلتھ اسٹریٹجی تیار کرلی گئی ہے، جس کا مقصد اسپتالوں پر مریضوں کا دباؤ کم کرنا اور عوام کو صحت مند رکھنا ہے۔
