ایران نے آبنائے ہرمز سے گزرنے والے کچھ دوست ممالک کو ٹرانزٹ فیس سے استثنیٰ دے دیا ہے۔ ماسکو میں ایرانی سفیر کاظم جلالی نے روسی میڈیا سے گفتگو کرتے ہوئے کہا کہ فی الحال چند دوست ممالک کو یہ رعایت دی گئی ہے اور وزارت خارجہ اس استثنیٰ کو برقرار رکھنے کی کوشش کر رہی ہے۔
ایرانی سفیر نے کہا کہ اگر دوسرا فریق مذاکرات چاہتا ہے تو ایران بھی مذاکرات کیلئے تیار ہے، تاہم اگر جنگ مسلط کی گئی تو ایران اس کا جواب دینے کیلئے بھی تیار ہے۔
دوسری جانب ایرانی پارلیمنٹ کے نائب اسپیکر حامد رضا نے دعویٰ کیا ہے کہ آبنائے ہرمز پر عائد ٹول ٹیکس سے پہلی آمدن ایران کو موصول ہو چکی ہے۔
امریکی میڈیا کے مطابق حامد رضا کا کہنا تھا کہ حاصل ہونے والی رقم مرکزی بینک کے اکاؤنٹ میں جمع کرا دی گئی ہے، تاہم اس حوالے سے مزید تفصیلات فراہم نہیں کی گئیں کہ یہ آمدن کس ملک یا ذریعے سے وصول کی گئی۔
